Wednesday, August 16, 2017

មកស្គាល់ប្រវត្តិកំពូលតារាសិចស៊ីប្រចាំទសវត្សរ៍ ៦០ សាក់ ស៊ីស្បោង ដែលល្បីដល់អឺរ៉ុប

ប្រិយមិត្តប្រាកដជាធ្លាប់ឮហើយឈ្មោះ សាក់ ស៊ីស្បោង ដែលគិតថាវាជាពាក្យហៅលេង ឬឈ្មោះរបស់តារាកំប្លែង តែការពិតវាជាឈ្មោះរបស់កំពូលតារាស្រីសិចស៊ីម្នាក់ក្នុងអំឡុងទសវត្សរ៍ឆ្នាំ៦០-៧០។ តារាស្រីរូបនេះមានទាំងសម្រស់ និងទេពកោសល្យសម្ដែងជាតួសិចស៊ី និងឆ្នាសឆ្នើម រហូតធ្វើឲ្យអ្នកគាំទ្រភាពយន្តជំនាន់នោះភាគច្រើនស្អប់អ្នកស្រី ដោយសារការសម្ដែងតួអង្គប្រភេទហ្នឹង។
ដើម្បីឲ្យកាន់ច្បាស់ ថ្ងៃនេះ Sabay លើកយកប្រវត្តិខ្លះៗរបស់អតីតតារាសម្ដែងស្រីរូបនេះឲ្យប្រិយមិត្តបានជ្រាបតែម្ដង៖
ជីវប្រវត្តិទូទៅ៖
សាក់ ស៊ីស្បោង កើតក្នុងឆ្នាំ ១៩៣៦ នៅរាជធានីភ្នំពេញ។ អ្នកស្រីជាប់សែស្រឡាយព្រះញាតិវង្ស នៃព្រះមហាក្សត្រខ្មែរ និងមានឪពុកជាមន្ត្រីជាន់ខ្ពស់ក្នុងព្រះបរមរាជវាំង។
ការសិក្សា៖
អ្នកស្រីជាអតីតសិស្សនៅ "សាលាបឋមសិក្សាហ្វ្រង់ស្វ័របូស្វាត" និងបានបន្តការសិក្សានៅ "វិទ្យាល័យព្រះស៊ីសុវត្ថិ" រួចបន្តចូលរៀននៅសាលាភាសាបារាំង "ដឺកាត" គ្រានោះ សាក់ ស៊ីស្បោង ចេះនិយាយភាសាបារាំងល្អដាច់គេ។ ចំណេះដឹងផ្នែកភាសានេះ បានធ្វើឲ្យអ្នកស្រីវិវឌ្ឍន៍ខ្លួនរហូតក្លាយជានារីអាកាសចរណ៍នៅឆ្នាំ១៩៦០។
ប្រវត្តិចូលសិល្បៈ៖
អំឡុងពេលកំពុងបម្រើការងារនោះ មានផលិតករបរទេសម្នាក់ឈ្មោះ "ម៉ាសេលកាម៉ុល" បានឃើញរូបសម្រស់ និងកាយវិការដ៏សមសួនពីធម្មជាតិរបស់អ្នកស្រី ក៏បានស្នើឲ្យចូលសម្ដែងក្នុងភាពយន្តខ្នាតអន្តរជាតិរបស់លោក។ ដោយចិត្តស្រលាញ់វិស័យសិល្បៈផងនោះ នារីអាកាសចរណ៍រូបនេះ ក៏សម្រេចចិត្តចូលសម្ដែងជាតួសំខាន់ក្នុងរឿង "បក្សីឋានសួគ៌" ឲ្យផលិតករខាងលើ។
រឿងដំបូងដែលអ្នកស្រីសម្ដែងនេះ ត្រូវបានដាក់បញ្ចាំងជាច្រើនប្រទេស ទាំងអឺរ៉ុប និងអាស៊ី។ ក្រោយបានឃើញពីសមត្ថភាពរបស់អ្នកស្រី មានផលិតករខ្មែរជាច្រើនទាក់ទងឲ្យទៅសម្ដែងជាហូរហែ រហូតអ្នកស្រីត្រូវបានមហាជនចាត់ទុកថាជាកំពូលតារាសិចស៊ី និងស៊ីវីល័យប្រចាំវិស័យសិល្បៈកម្ពុជា។
សម្ធិទផលធំៗក្នុងវិស័យសិល្បៈ៖
នៅឆ្នាំ ១៩៦៤ សាក់ ស៊ីស្បោង ក៏បានចូលរួមប្រលងបវរកញ្ញាបង្ហាញម៉ូដរថយន្ត ក្នុងមហោស្រពទីក្រុងកែប ថែមទាំងទទួលបានពាន ចំណាត់ថ្នាក់លេខ៣ទៀតផង។

ឆ្នាំ១៩៦៦ អ្នកស្រីទទួលបានជោគជ័យយ៉ាងសម្បើមតាមរយៈរឿង "វិលវិញណាបង" របស់ផលិតកម្ម "តារារដ្ឋភាពយន្ត"។
មិនត្រឹមតែប៉ុណ្ណោះ សាក់ ស៊ីស្បោង ធ្លាប់ត្រូវបានអញ្ជើញឲ្យសម្ដែងក្នុងរឿងល្បី៤រឿងរបស់ ព្រះបរមរតនកោដ្ឋ គឺ៖ រឿង "អប្សារា" "រស់ដោយសប្បាយចិត្ត" "ព្រះប្រជាកុមារ" និង "វាសនាអកុសល"។
ឆ្នាំ ១៩៦៩ អ្នកស្រីបានទទួលពានរង្វាន់មាស ជាតួស្រីស្រស់ស្អាតឆើតឆាយ ពី មហោស្រពភាពយន្តជាតិលើកទី១។
ពីឆ្នាំ១៩៦២ ដល់ ១៩៧៤ អ្នកស្រីបានបង្ហាញមុខជាតួរង និងតួសំខាន់ក្នុងភាពយន្តល្បីៗជាច្រើន។ មិនត្រឹមតែប៉ុណ្ណោះ អ្នកស្រីក៏ធ្លាប់គ្រងតំណែងតួឯកក្នុងរឿងមួយចំនួនដែរដូចជា៖ "បក្សីចាកមេឃ" និង "ផ្លូវបែកជាបី"។
គ្រួសារ និងស្នេហា៖
អតីតកំពូលតារាស្រីរូបនេះ បានរៀបអាពាហ៍ពិពាហ៍ ជាមួយអ្នកបើកយន្តហោះ ក្នុងឆ្នាំ ១៩៦៥ និងមានកូនប្រុសម្នាក់ នៅឆ្នាំ១៩៧២។
ដើម្បីគេចពីសង្គ្រាម រូបអ្នកស្រី និងស្វាមី បានចាកចេញពីកម្ពុជា ទៅប្រទេសបារាំង ក្នុងឆ្នាំ ១៩៧៤។ សព្វថ្ងៃ អ្នកស្រីរស់នៅប្រទេសអាល្លឺម៉ង់ ដោយឃ្លាតចេញពីវិស័យសិល្បៈ៕